#Balkanpride
"Hidh bukën tënde mbi ujërat, sepse
pas shumë kohe do ta gjesh përsëri." - Predikuesit 11:1, Bibla
Shqipëria e "hodhi bukën e vet mbi
ujëra" për Kosovën në 1999 dhe e gjeti pas 20 vitesh në Kosovë sërish.
Asgjë e mirë nuk shkon duarbosh, aq më tepër mes vëllezërish.
Të donte Ballkani të ecte përpara e të begatonte,
i ka të gjitha shanset që kjo të ndodhë. E gjitha qëndron te vullneti i
popujve, nëse janë të gatshëm të bashkëfalin (po, të gjithë kemi shumë gjëra
për të falur!) e të lenë pas të shkuarën që i mban peng për interesa të
tjetërkujt.
Nëse ndodh që vetë Serbia të nisë trupa e
ndihma në të mirë të Shqipërisë, nëse grekët shkruajnë shqip ngushëllimet për
nesh, nëse nuk ka vend që nuk ka nisur më të mirën ndaj nesh në këtë tragjedi
që shënon epokë të re për vendin tonë, ndoshta po shënohet vërtet një epokë e
re edhe për gjithë rajonin tonë. Nuk kemi asnjë arsye pse jo, nëse popujt nuk
gënjehen në urrejtje pa vlerë ndaj njëri-tjetrit shtyrë nga politikanë e
gjarpërinj të brendshëm e të jashtëm. Nuk na mungon asgjë as për mend, as për
kapacitet, as për vlera... nëse nuk lejojmë gjarpërinjtë të na helmojnë.
U desh të buçiste Rodoni (hyjnia ilire
simbol i deteve tona) nga zemra e Ballkanit - Durrësi - që të shkundej gjithë
Ilirikumi i dikurshëm. Për mua nuk ka asgjë të rastësishme, asgjë pa kuptim.
Ne jemi një pjesë unike dhe e
patjetërsueshme e kontinentit të lashtë, shpeshherë të shtyrë mënjanë e të
padashur nga perëndimi e shpeshherë të përpirë me zor nga lindja. Nuk ka nevojë
Ballkani të jetë mjeran e lypsar portash e fuqish të mëdha. Kur jemi tok, jemi
toka më e fortë.
(P.s. Gjithë ndihma e vendeve të tjera
joballkanike është njësoj e çmuar dhe ka mirënjohjen time e të cilitdo
shqiptar. Por ndihma dhe dora e shtrirë e fqinjit dhe supi i ngrohtë i vëllait
është bukuri pa krahasim.)
 |
| Buka shqiptare në ujëra. 1999 / 2019. |
Comments
Post a Comment